കണ്ടുമുട്ടല്‍

വല്ലപ്പോഴുമുള്ള ചില ഒറ്റപ്പെടലുകളെ

കുറിച്ചു  പറഞ്ഞാണ് നാം   

അന്നൊക്കെക്കലഹിച്ചത്.

ചിലപ്പോ ള്‍,  

ഒരുമിച്ചെറിഞ്ഞു വീഴ്ത്തിയ

മാങ്ങകളുടെ വീതത്തെക്കുറിച്ചും...
പഠിച്ചല്ല, മൂത്രം നീട്ടിയൊഴിച്ചാണ് നാം മത്സരിച്ചത്.

പരീക്ഷപ്പേപ്പറുകളി ല്‍ ഒരുപോലെ എഴുതി നിറച്ച

തെറ്റുകള്‍  ശരികളെന്നു വാദിച്ച്

പേനയുടെ മുനയൊടിച്ച്

മഷി കുടഞ്ഞാര്‍ത്താര്‍ത്ത് 

ഒടുക്കം

മാര്‍ക്കുക ള്‍ വന്നപ്പോ ള്‍  അവിടെയും  ചില്ലറപ്പിശക്

പിണങ്ങിത്തീരും മുമ്പേ 

ഉപ്പുമാങ്ങ മാറിമാറി കടിച്ചും 

ഐസൂമ്പിയും നമ്മള്‍ വീണ്ടും കൂടി.     

കാലം തോറ്റു തുന്നംപാടിയപ്പോ ള്‍  

നമ്മള്‍ രണ്ടു വഴികളില്‍ അകന്നുപോയി.

ഇപ്പോള്‍ വീണ്ടും കണ്ടുമുട്ടുമ്പോ ള്‍

സുഹൃത്തേ...

ഒന്ന് പിണങ്ങുവാന്‍ പോലും  ആകാവിധം

നമ്മള്‍ മാറിപ്പോയിരിക്കുന്നു.