Tuesday, September 18, 2012

തോവാളപ്പൂക്കള്‍


തോവാളപ്പൂക്കള്‍ 
നമ്പി മലയിലേക്കുള്ള യാത്രാവഴിയില്‍ തോവാളയില്‍ ഒന്ന് നിന്നു. തോവാളപ്പൂക്കള്‍ പ്രസിദ്ധമാണല്ലോ ? വഴിയില്‍ ഒരു വയസ്സ് ചെന്ന അമ്മച്ചിയോട്‌ പൂന്തോട്ടം എവിടെ എന്ന് തിരക്കി. "ഒന്നുമേയില്ല ... വയലൊക്കെ നാടായി.. വീടായി ... ഇവിടെ ചന്ത മാത്രം ..."  
സുഹൃത്ത്‌ ഗിരീഷിന്റെ കാര്‍ റോഡരികില്‍ ഒതുക്കി  പാര്‍ക്ക് ചെയ്ത് ഞങ്ങള്‍ ചന്തയിലേക്ക് നടന്നു .
ശരിയാണ്. തോവാളയില്‍ കൃഷി കുറവാണ്. മുല്ലയും പിച്ചിയും കനകാംബരവും  മാത്രം ചെറിയ തോതില്‍ കൃഷി ചെയ്യുന്നു . ഈ മേഖലയിലെ വരണ്ട കാലാവസ്ഥ പൂകൃഷിക്ക്  അനുയോജ്യം  .മറ്റു പൂക്കള്‍ എല്ലാം തമിഴ്നാടിന്റെ വിവിധ ഭാഗങ്ങളില്‍ നിന്നും വരുന്നതാണ്. 
തോവാള  പൂച്ചന്ത
 നേരം പുലര്‍ന്നു വരുന്നതേയുള്ളൂ    .  പക്ഷെ പൂച്ചന്തയില്‍ വലിയ തിരക്ക്.  
പൂക്കച്ചവടക്കാരന്‍ വിശ്വനാഥനോട്   ചില വിവരങ്ങള്‍ തിരക്കി  കന്യാകുമാരി ജില്ലയിലാണ് തോവാള . എങ്കിലും തിരുനല്‍വേലി ജില്ലയിലെ നങ്ക്നേരി , രാധാപുരം താലൂക്കുകളില്‍ നിന്നാണ് നല്ല ഭാഗം പൂക്കള്‍ വരുന്നത് . കൂടാതെ മധുരയില്‍ നിന്നു തുടങ്ങി തമിഴ്നാടിന്റെ പല ഭാഗത്തുനിന്നും പൂക്കള്‍ ഈ ചെറിയ ചന്തയില്‍ എത്തുന്നു . രാവിലെ അഞ്ചു മണി മുതല്‍ മാര്‍ക്കറ്റു തുടങ്ങും. അത് പകല്‍ പത്തു പതിനൊന്നുമണി വരെ പോകും. ഇവിടെ നിന്നും പൂക്കള്‍ രാജ്യത്തിന്റെ വിവിധ ഭാഗങ്ങളിലേക്ക് വിതരണം ചെയ്യപെടുന്നു. ഗള്‍ഫ്‌ മേഖലയിലേക്കും ഇവിടെ നിന്നും പൂക്കള്‍ പോകുന്നുണ്ട്. കേരളത്തിലേക്ക് വരുന്ന പൂക്കളില്‍ നല്ല ഭാഗവും തോവാളയില്‍ നിന്നാണ് . 
ഒരാളോട് വില തിരക്കി. അരളി ഒരു കൂടക്ക് മുപ്പതു രൂപ . റോസാപ്പൂ കിലോക്ക് നൂറ്റിയമ്പത് ... പിച്ചി പാക്കറ്റിന് ഇരുപത്തിയഞ്ച്  ! കനകാംബരം.. മുല്ല ..ചെണ്ടുമുല്ല .. താമരപ്പൂ .... ചെമ്മന്തി  (ജമന്തി ? ) അങ്ങനെ എത്രയോ തരം പൂക്കള്‍ .. കൂടാതെ താമര ഇലകള്‍ വില്‍പ്പനക്ക് ഉണ്ട്. മാല കെട്ടാനുള്ള നാരും.

വിശ്വനാഥന്‍

താമരപ്പൂക്കള്‍  വില്‍പ്പനക്ക് 
  ഒരുവശത്ത് മാല കെട്ടുന്നവര്‍ ഇരിക്കുന്നു. എത്ര വേഗമാണ് അവള്‍ ഭംഗിയുള്ള മാല തീര്‍ക്കുന്നത് ! 
ഇവിടെയും ഇടനിലക്കാര്‍ ഉണ്ട് എന്ന് തോന്നി. അപ്പോള്‍ ചൂഷണവും കാണും .  പല മുഖങ്ങളിലും ജീവിതത്തിന്റെ ബുദ്ധിമുട്ടുകള്‍ തീര്‍ത്ത വടുക്കള്‍ കാണാം. അകലെ നഗരത്തില്‍ പൂക്കടയില്‍   വിപ്പനക്ക് ഈ പൂക്കള്‍ എത്തുമ്പോള്‍ ഏതെല്ലാം വഴികളാണ്  അവ താണ്ടുന്നത്  ! പവിത്രമായ വിഗ്രഹങ്ങളിലും വലിപ്പം നടിക്കുന്ന രാഷ്ട്രീയക്കാരനിലും എന്നുവേണ്ട ശവമഞ്ചങ്ങളില്‍ വരെ അവ ഒടുക്കം എത്തിച്ചേരുന്നു .    
പൂക്കൂമ്പാരങ്ങള്‍ക്കിടയില്‍   
തമിഴ്നാട് സര്‍ക്കാര്‍ ഒരു ശീതീകരണ ശാല ഈ മേഖലയിലെ പൂക്കച്ചവടത്തെ   പോഷിപ്പിക്കുവാന്‍ വാഗ്ദാനം നല്‍കി. പക്ഷ വൈദ്യുതി ക്ഷാമം രൂക്ഷം . ഇവിടെനിന്നും അധിക ദൂരത്തല്ല അടുത്തുതന്നെ പ്രവര്‍ത്തനം തുടങ്ങുവാന്‍ പോകുന്ന കൂടംകുളം  ആണവനിലയം.  നിലയം ഇവിടെ  വന്നതില്‍ പിന്നെ ഈ മേഖല കാര്യമായി പുരോഗമിച്ചു. ജീവിത സൌകര്യങ്ങള്‍ വര്‍ദ്ധിച്ചു.   ഇനി  വൈദ്യുതി ക്ഷാമം കൂടി തീരുന്ന ആ നല്ല നാളുകള്‍ക്കായി കാത്തിരിക്കുന്നു നാട്ടുകാര്‍ . 
( ക്യാമറ -  Nikon Coolpix L10)
-----------------------------------സ്നേഹപൂര്‍വ്വം കണക്കൂര്‍  

13 comments:

  1. പൂക്കള്‍ എന്ന് കേള്‍ക്കുമ്പോള്‍ ഓടിയെത്തുന്ന പേരാണ് തോവാള.
    തോവാള എന്ന പേരിനും എന്തോ ഒരു പ്രത്യേകത അല്ലെ?

    ReplyDelete
    Replies
    1. നന്ദി റാംജി... താങ്കളുടെ പുതിയ സൃഷ്ടി ഉടനെ കാണുമല്ലോ ?

      Delete
  2. തോവാളപ്പൂക്കള്‍ വിവരണം നന്നായിരിക്കുന്നു;
    ചിത്രങ്ങളും.
    ആശംസകള്‍

    ReplyDelete
    Replies
    1. വായനക്കും ആശംസയ്ക്കും നന്ദി .. ജി

      Delete
  3. അറിവുകള്‍ക്ക് നന്ദി.കൂടംകുളം രക്ഷയോ ശിക്ഷയോ?ആശയക്കുഴപ്പം തന്നെ.

    ReplyDelete
    Replies
    1. കരന്റില്ലാതെ ഇനി ജീവിക്കാന്‍ പറ്റുമോ നമുക്ക് ?

      Delete
  4. എന്റെ ഒരു കാര്യമെ , ഞാന്‍ ആദ്യം ചിന്തിച്ചു
    ഇതൊരു തരം പൂവാണെന്ന് ... തൊവാളപ്പൂക്കള്‍ ...
    പൊസ്റ്റിന് തന്നെ ഒരു പൂമണം ...!
    ഇതിലും നാടിന്റെ ദുര്‍ഗതി , വിസ്മൃതിയിലേക്ക്
    പൊകുന്ന ചിലതിന്റെ ആകുലതകള്‍ മാഷ് പങ്ക് വച്ചിട്ടുണ്ട്
    എന്നത്തേയും പൊലെ ..
    സത്യത്തില്‍ , ജനപ്പെരുപ്പമാണെന്ന് തൊന്നുന്നു
    എല്ലാതിന്റെയും കാതലായ പ്രശ്നം .....
    പക്ഷേ അതാരും ചെവികൊള്ളുന്നതുമില്ല ..
    ദൈവം തരുന്നൂന്ന് പറഞ്ഞ് കൈമലര്‍ത്തുന്ന സമൂഹം ..

    ReplyDelete
  5. ആദ്യമായി കേള്‍ക്കുകയാട്ടോ ഈ സ്ഥലം. നല്ല വിവരണം. യാത്ര തുടരട്ടെ..

    ReplyDelete
  6. അറിയാത്ത ദേശം .. കാണാത്ത കാഴ്ചകള്‍
    ഒരു പൂമണം മാത്രം ഇപ്പോഴും മനസ്സിലുണ്ട്...
    മനസ്സില്‍ മാത്രം...
    കാരണം ഞാനും ഇന്ന് മനസ്സില്‍
    ഓര്‍മ്മയുടെ കണ്ണ് തുറന്നു വെച്ച പ്രവാസിയാണ്

    ReplyDelete
  7. തോവാളപ്പൂക്കളെക്കുറിച്ച് ഏറെ കേട്ടിരിക്കുന്നു....
    നല്ല വിവരണവും ചിത്രങ്ങളും.....

    ReplyDelete
  8. തോവാളയിലെ കാറ്റിനുപോലും പൂമണമാണോ..??

    ReplyDelete
  9. കണക്കൂർ... പൂക്കൾ എന്ന് കേൾക്കുമ്പോൾ ഏതൊരു മലയാളിയുടെയും മനസ്സിൽ ഓടിയെത്തുന്ന പേര് തോവാള തന്നെയായിരിയുമെന്നതിൽ സംശയമില്ല...അതുകൊണ്ടുതന്നെ എന്റെ പേര് കേൾക്കുമ്പോൾ പലരും ചോദിയ്ക്കാറുമുണ്ട് പൂക്കളൂടെ നാട്ടിൽനിന്നാണോ എന്ന്.. പൂമണം വിതറുന്ന തോവാളയേക്കുറിച്ചും, പൂക്കളേക്കുറിച്ചുമുള്ള ഈ വിവരണം വളരെ നന്നായിട്ടുണ്ട്.. ഒപ്പം മനോഹരമായ ചിത്രങ്ങളും..

    ReplyDelete
  10. നല്ല വിവരണം ..
    ഇടയ്ക്ക് അശ്രദ്ധ ഒരക്ഷരം വിഴുങ്ങി.
    "പൂക്കടയില്‍ വിപ്പനക്ക് ഈ പൂക്കള്‍"
    അക്ഷര തെറ്റ് എന്നില്‍ ഞാന്‍ ക്ഷമിക്കും . പക്ഷെ താങ്കളില്‍ പറ്റില്ല ...:)

    ReplyDelete